السبت  22  نوفمبر  2014
  • من نحن
  • راسلنا
  • اعلن معنا
  • ادعمنا
  • الشاعر الكبير أزهري محمد علي يرثي حميد

    March 21, 2012  

    (حريات)

    جرح الوطن ختالنا خط

    مامنو نط

    وحميد ختالنا خط مامنو نط

    الليلي ياموت يا حيا

    خاتي البختار الوسط

     خاتي البختار الوسط

    يافطون

    فطن حميد فطمنا غنانا

    لا طاطينا لا سبنا الخيول تاطانا

    قدمناه امام لا ضلا لا ضلانا

    ماهاب السجون مافزه من سيطانا

    وكت الكور حما ثابت ركز لبطانا

    لكن البلاد باعت ايادى بطانا

    عالجه بالرحيل مدت وراه لسانا

    جربه بالعويل قلبت حديثه رطانا

    حنسه بالهديل رخت الحبيبه اضانا

    زى كل الطيور دايما تحن لوطانا

    ما ضاق الوطن بس كبرت الزنزانة

    ويا دى البلاد الكل ماطايبتها

    فتحت على جرحك جرح

    الكل ما نقطلها الكلمات عسل

    نزلت على خاطرك ملح

    لا تاكت ابوابها الانيقه ورحبت

    لا ليله بجيتك فرح

    يادى البلاد

    وين نحن هسى فى ياتو ليل

    فى يات صباح

    كل الشوارع تشتبه فيك

    وتشابه بعضها

    كل البيوت الواقفه طولها

    تستبيح فى عرضها

    وانا روحى تشتاق لبلاد

    كان طينى من طين ارضها

    ديك البلاد اللابتفوت فيك وكت

    لا يوم بتترك فرضها

    يوماتى واصله بالحنين

    يوماتى هى الفى النوم

    تجيلك برضها

    اشتقت ليها الشوق غلب

    اشتقت انزع همى

    فى عتبات بيوتها الواسعه

    وانزع فى ضل عصاريها التعب

    غنيتا بادب المديح

    سمت غناى قلة ادب

    ومشيت وراها ضريح ضريح

    فتشت فى كل القبب

    دقشت وراء الرزق الشحيح

    ما اغنى مالها وما كسب

    شغلوها بالنبى والمسيح

    واتقاسموها رتب رتب

    فى كل حته حصار حصار

    فى كل فجه لهب لهب

    صمدت امام وابل الرصاص

    سقطت امام وابل الخطب

    حنيت عليها من الضهب

    حنيت على زحمة خطاها

    التايهة بين رحمه وغضب

    حنيت على دمى المشتت

    فيها بين زنجى وعرب

    حنيتا ياخى بلا سبب

    ما دى البلاد اللا جلبتها

    للمدائن الصاخبه مقطوعة رحم

    ولا تركتها فى الفيافى الشاحبة

    مجهولة نسب

    ولا رفعتها فى الرماح

    ولا مرقتها للمنافى

    الواسعه تذروها الرياح

    انا كنت كل ماالليل يفلل بندها

    ياصابره حى ياصابره حى

    ياصاااابره حى على الفلاح

    ياصاااابره حى على الفلاح

    ياصابره حى على الليالى

    الفاتحه لوش الصباح

    ياصابره حى على المدائن

    الفاضله والقول المباح

    لو كنت اقدر انزعك

    من مخالب الخوف وجلجلة السلاح

    ماكنت تانى رجعت ليك

    خاوى اليدين دامى الخطى

    ومكسور جناح

    ولا كان نسيتك فى الزحام

    تتعاطى مر الذكريات الفاجعة

    والخدر الحرام

    يادى البلاد الكل ماطايبتها

    طاب ليها فى النفق المقام

    زوجتها الحلم الجميل

    خطبت خفافيش الضلام

    وغنيته ما شاء الهديل

    رطنت بما شاء الامام

    راوضتنى وروضت كل الحواس

    وهدهدت فى صحوى

    شهوات المنام

    ياطفلة ابلغ من غناى

    واجلّ عن كل الكلام

    فرت ضفايرها ضفتين

    والرمش تعريشة غمام

    والثغر شخبين من حليب

    والصدر برجين للحمام

    جلست فما ابهى الجلوس

    وقامت فما اسمى القيام

    دخلت على الناس المسرة

    ومرقت على الارض السلام

    ويا صابرة مادام الاسف

    اسف على صبرك معاى

    اسف على صبرك على

    اسف على صبر السنين المرة

    عام من بعد عام

    واسف اذا طال الشتات

    فى الغربة او عزّ المرام

    واسف اذا طرف المدن

    فراها اجنحة الخيام

    ونذرتي عمرك للنزوح

    للجوع واسلمت الطعام

    واسف على هذا الكلام

    اسف على هذا الكلام

    اسف

    وداعاً اخي صديقي وحبيبي حــــــمــــيــــد

    ازهرى محمد على

    Share

    التعليقات

    ( التعليقات الواردة تعبر عن رأي كاتبها ولا تعبر عن رأي الصحيفة)

    7 تعليق على “الشاعر الكبير أزهري محمد علي يرثي حميد”

    1. د. ياسر الشريف في March 21st, 2012 12:29 pm

      يا سلام
      أحسن الله عزاءك أخي أزهري وأحسن عزاءنا.

      نسأل الله له واسع الرحمة والغفران وعالي الجنان

      ياسر

    2. السراج محمد على في March 21st, 2012 6:58 pm

      الأستاذ أزهرى أحسن الله عزاءك فى رفيق الحرف والنضال شاعر الغبش على إمتداد ربوع له الرحمة ونتمنى نيسر على دربه ونعيش كما عاش كريماً شريفاً لم يساوم بقضايا ولم يغره متاع الدنيا الزائل فقضى عمر كله حتى وافته مدافعاً حقوق الكادحين والمسحوقين

    3. محمد صبار في March 21st, 2012 8:13 pm

      لك التحية والتجلة شاعرنا الهمام الاستاذ ازهري وكل اصابع الشعب تشير اليك لقيادة دفة صوت الحق
      رحيل حميد جرح عميق ولكنه دون جدال سيظل فينا ما حيينا له الرحمة وللشعب السوداني الصبر الجميل

    4. محمد سليمان في March 22nd, 2012 7:41 am

      يا ازهرى داير تلبس عباية حميد وانت بعيد كل البعد عنو – حميد مافى زول بشبهو – هسة الجماعة ديل كان جابوك بكرة فى ندوة حا تحلف بحياة الانقاذ – الكلمة المناضلة ما فضل ليها وجيع بعد الا محجوب شريف امد الله فى عمره – وانت داير تقشر بى مرثية من دموع التماسيح – على زول بقامة نادوس والجابرية وست الدار ونورة تفاحة الجروف – احسن الله عزاءنا نحن الغبش واهل حميد وليس شعراء الانقا> امثالك

    5. محمد سليمان في March 22nd, 2012 7:42 am

      يا ازهرى داير تلبس عباية حميد وانت بعيد كل البعد عنو – حميد مافى زول بشبهو – هسة الجماعة ديل كان جابوك بكرة فى ندوة حا تحلف بحياة الانقاذ – الكلمة المناضلة ما فضل ليها وجيع بعد الا محجوب شريف امد الله فى عمره – وانت داير تقشر بى مرثية من دموع التماسيح – على زول بقامة نادوس والجابرية وست الدار ونورة تفاحة الجروف – احسن الله عزاءنا نحن الغبش واهل حميد وليس شعراء الانقاذ امثالك

    6. الله غالب في March 22nd, 2012 10:52 am

      الاخ محمد سليمان اقسم بانك لا تعرف ازهري نعم حميد هو الاول وهو الاصل ولكن هذا لا يقلل من ازهري لانة ظل صامد بمواقفه ان كنت لا تعرفه فنحن نعرفه وارجوك لا تحكم علي الاشياء قبل ان تكون

    7. اسلام محمد في March 31st, 2012 8:33 am

      احسن الله عزائك الاستاذ ازهري ابراهيم ونسال الله الرحمة والمغفرة للمرحوم المغفور له باذن الله الاستاذ حميد

    لا تتردد في ترك التعليق...