الخميس  23  أكتوبر  2014
  • من نحن
  • راسلنا
  • اعلن معنا
  • ادعمنا
  • طارق الامين فى قصيدة عن غرق 14 سوداني في الطريق لأستراليا

    September 1, 2013  

    000123(حريات)

    جنس حالة

     طارق الامين

    ياخالق اللجوء وين نمشي

    طالبين الهدوء وين نمشي

    يارب العباد وين نمشي

    في هذي البلاد وين نمشي

    ربينا الجداد اتوفي

    لامونا العباد

    بارينا البنوك قبضونا … لي حين السداد

    كملنا القعاد في الضللة

    وخمينا الرماد

    في حفله هجيج مع حوته

    او عقد الجلاد وين نمشي

    شقينا الدروب وفترنا

    في بلد الحروب

    انفصل الجنوب واتوسد

    الفجر الكذوب وين نمشي

    قاعدين في الهبوب يالله

    وفاضيات الجيوب

    اشتهت القلوب الشردة

    وادمنا الهروب

    ويت نمشي

    الصبر العنيد والهمة

    والحر الشديد

    لاشفنا البلاد وعمارا

    في الفجر الجديد

    لا الساسة الكتار سوولنا

    مستقبل سعيد

    وين نمشي

    سودانا القديم ياحليلو

    والغنا والنشيد

    لاشفنا القديم قدامنا

    لا طلنا الجديد

    وين نمشي

    شدينا الرحال وين نمشي

    لي بلد الريال

    خريجين رعاة للماشية

    تدبير وانتحال

    شان نلقي الاهل بالسترة

    والرزق الحلال

    في زمن الريال يالله

    اصبح كالمحال

    وبين امشي وتعال ياربي

    اعيانا النضال

    كشتنا المدينة الفاضلة

    وزلونا الرجال

    شدينا الرحال وين نمشي

    لي خلف البحار

    دولار للعمار يالله

    دولار للايجار

    دولار للرغيف ينجينا

    من موية الخريف

    في سفن الهلاك

    والموعد هناك

    شن بحصل اخوي

    نعوم متل القعوي

    شان امي وابوي

    شان اختي واخوي

    كندا واستراليا

    بنما واندونيسيا

    مافرقت كتير

    يلاك ياحبيب

    نقول للدنيا خير

    نغرق او نموت

    او يضربنا بوت

    نقفل باب عمرنا

    وتنفتح البيوت

    نسير والدنيا سايرة

    شان امونه دايرة

    وحاجه سكينه دايرة

    وخالتو مدينة دايرة

    وحاجه النعمة حايرة

    نعبر ياصديق

    نفرج كل ضيق

    نطفطف للحريق

    ونمشي علي الغريق

    نحول للحبايب

    والاهل القرايب

    دولارات معزة

    تعين وكت المصايب

    نفتح باب املنا

    نقش دمعة اهلنا

    هروب في اي قارب

    هروب بعد المغارب

    كندا استراليا

    بنما اندونيسيا

    مافرقت معانا

    نلتمس المودة

    والرحمة وحنانا

    يلاك ياصديقي

    للزمن الحقيقي

    غرقانين جوانا

    والنار في حشانا

    يلاك وابقي صابر

    نتحدي المعابر

    لي تلك المنابر

    او قل للمقابر

    مافرقت معانا

    طارق الأمين

    30 أغسطس 2013م

    Share

    التعليقات

    ( التعليقات الواردة تعبر عن رأي كاتبها ولا تعبر عن رأي الصحيفة)

    2 تعليق على “طارق الامين فى قصيدة عن غرق 14 سوداني في الطريق لأستراليا”

    1. بشىر محمد الحسن في September 1st, 2013 3:12 pm

      شنوالحاصل شنوالبحصل
      بعد ماكرامتك انهدت
      بعد ماكيانك اتزلزل
      قول منعول ابوالوطن البخلى
      جناه يتبهدل
      اكرب جرة فوق الجره
      وامق ياخي لابره
      بيواسوق
      بيسفروق بى عكازك اب ضبه
      بيطورىه بيمنجل
      خل الدم يسيل ويسيل ماتحزن ولا تزعل
      عشان دم الشهيد بيبق في قلب الظلام مشعل

      مافي حصاى ماقام بي وراه نخل
      مافى شهىد مابتق ورود شتل

    2. mohammed musa في September 2nd, 2013 10:27 am

      برغم التعب والهم ووالعذاب الا ليل الحزن قرب ينجلي بالصبر والثبات سنقاوم من اجل فجر جديد لوطن اوسع واجمل .

    لا تتردد في ترك التعليق...